「呢一代Teen青研究」（Hong Kong Youth Epidemiological Study of Mental Health，HK-YES）係香港大學精神醫學系嘅其中一個研究，旨於深入分析香港年青人嘅精神健康狀況同精神異常嘅成因，幫助我哋搵到有效預防及促進心理同精神健康嘅方法，並且為將來嘅精神健康服務設計出合適嘅藍圖。

香港大學精神醫學系一直致力推動社會關注大眾嘅精神健康。透過學術研究、臨床診治、服務發展、公眾教育等，我哋希望可以提升大眾嘅精神健康及協助建立精神財富。「headwind 迎風」係我哋喺2020年推出嘅青年精神健康平台，當中包括免費精神健康諮詢（可以見精神科專科醫生）、精神健康介入手機平台「心之渡」、不記名嘅線上心理狀況評估工具「心之流」及HK Youth Mental Health Consortium等。